سردی کب آئے گی؟ ماہرین نے بتا دیا

کراچی (ویب ڈیسک) موسم کی پیش گوئی کرنے والے متعدد اداروں نے امکان ظاہر کیا ہے کہ کراچی میں نومبر کے وسط سے موسم سرما کے اثرات نمایاں ہونا شروع ہوجائیں گے۔

نجی ٹی وی" آج نیوز" کے مطابق خیال رہے کہ کراچی اور اندرون سندھ ان دنوں گرمی کی لپیٹ میں ہیں جہاں درجہ حرارت 38 سے 40 سینٹی گریڈ ریکارڈ کیا گیا ہے۔ اس حوالے سے واضح رہے کہ اکتوبر کے آخر تک گرمی کی شدت میں کمی کا امکان نہیں ہے۔

محکمہ موسمیات نے پیشگوئی کی ہے کہ نومبر کی 6 یا 7 تاریخ سے موسمی تبدیلی شروع ہوجائے گی اور نومبر کے وسط تک دن میں درجہ حررات 32 اور 34 سینٹی گریڈ تک آجائے گا۔مزید برآں، نومبر کے وسط میں شروع ہونے والی ٹھنڈی راتوں کی توقع ہے، جس سے رہائشیوں کو جاری گرمی سے راحت ملے گی۔

کوئٹہ میں کم سے کم درجہ حرارت 5، قلات میں 6 ڈگری ریکارڈ کیا گیا، ژوب میں کم سے کم درجہ حرارت 6 اور زیارت میں 5 ڈگری ریکارڈ ہوا۔

اس کے علاوہ سبی میں درجہ حرارت 38، تربت میں40، نوکنڈی میں 34، چمن میں 27، گوادرمیں 33 اور جیوانی میں 32 ڈگری ریکارڈ کیا گیا۔

ادھر غذر میں پت جھڑ کا موسم شروع ہوتے ہی علاقے میں سردی نے انٹری ڈال دی، گلگت بلتستان اور بالائی علاقوں کے پہاڑوں پر ہونے والی برفباری سے عوام کو ایندھن کے حصول میں مشکلات کا سامنا ہے۔