اسلام آباد(ڈیلی پاکستان آن لائن)مسلم لیگ ن انتخابی اصلاحات کی پارلیمانی کمیٹی میں اتحادی جماعتوں کو نمائندگی دینے کے لیے اپنے حصے میں کمی کرنے پر غور کررہی ہے۔
جیو نیوز کے مطابق حکومتی ذرائع کا کہنا ہے کہ مسلم لیگ (ن) تناسب سے ملنے والے اپنے حصہ میں کمی کرے گی جبکہ مسلم لیگ ق، آئی پی پی اور مسلم لیگ ضیاء کا ایک ایک رکن قومی اسمبلی کمیٹی میں شامل کیے جانے کا امکان ہے۔
ادھر حکومت نے انتخابی اصلاحات کی پارلیمانی کمیٹی کے لیے پیپلز پارٹی اور ایم کیو ایم سے نام مانگے ہیں۔
ذرائع کے مطابق وفاقی وزیر پارلیمانی امور طارق فضل چودھری نے چیف وہپ پیپلزپارٹی اعجاز جاکھرانی اور ایم کیو ایم کے چیف وہپ امین الحق کو خطوط لکھ دیئے ہیں۔
طارق فضل چودھری نے سپیکر کے خط کی روشنی میں حکومتی جماعتوں سے پارلیمانی کمیٹی کے لیے نام مانگےہیں۔
