لاہور(ڈیلی پاکستان آن لائن) پاکستان مسلم لیگ (ن) کے صدر محمد نواز شریف اور وزیراعلیٰ پنجاب مریم نواز شریف سے سعودی عرب کے سفیر نواف بن سعید المالکی نے الوداعی ملاقات کی۔
نجی ٹی وی چینل دنیا نیوز کے مطابق سعودی سفیر نواف بن سعید المالکی وزیراعلیٰ آفس پہنچے جہاں ان کا پرتپاک خیرمقدم کیا گیا۔
ملاقات کے دوران نواز شریف اور مریم نواز شریف نے سعودی سفیر کی پاکستان اور سعودی عرب کے درمیان دوطرفہ تعلقات کے فروغ کے لیے سفارتی خدمات کو سراہا۔
سعودی سفیر نے پاکستان میں اپنے قیام کو یادگار قرار دیتے ہوئے پرتپاک میزبانی پر نواز شریف اور مریم نواز شریف کا شکریہ ادا کیا۔
ملاقات میں پاکستان اور سعودی عرب کے درمیان برادرانہ تعلقات اور باہمی تعاون کی اہمیت کا بھی اظہار کیا گیا۔
