لاہور (ڈیلی پاکستان آن لائن) جشنِ آزادی کے موقع پر شہر میں ون ویلنگ، روڈ ریسنگ اور ہلڑبازی کرنے والوں کے خلاف آہنی ہاتھوں سے نمٹنے کا فیصلہ کیا گیا ہے اور ٹریفک پولیس کے مطابق مجموعی طور پر 120 سے زائد موٹرسائیکلیں بلیک لسٹ کی گئی ہیں، جو اب سیف سٹی کیمروں کی نظر میں آتے ہی فوری قانونی کارروائی کا نشانہ بنیں گی۔ سی ٹی او لاہور نے واضح کیا ہے کہ صوبائی دارالحکومت کی سڑکوں پر ون ویلنگ، روڈ ریسنگ اور خطرناک کرتب دکھانے والوں کے لیے کوئی گنجائش نہیں ہے، اور روڈ بلاک کرکے ہلڑبازی کرنے والوں کے خلاف قانون پوری سختی سے حرکت میں آئے گا۔
جشنِ آزادی کی آڑ میں امن عامہ خراب کرنے اور قانون شکنی کرنے والے شرپسند عناصر کی نشاندہی کے لیے سیف سٹی کیمروں کی خصوصی مدد لی جائے گی۔ سی ٹی او لاہور نے واضح کیا ہے کہ اس حوالے سے زیرو ٹالرنس پالیسی اپنائی گئی ہے اور جشنِ آزادی پر کسی بھی قسم کی قانون شکنی برداشت نہیں کی جائے گی۔علاوہ ازیں، سی ٹی او لاہور نے والدین سے اپیل کی ہے کہ وہ اپنے بچوں پر کڑی نظر رکھیں تاکہ کسی بھی ناخوشگوار حادثے یا قانون شکنی سے بچا جا سکے۔
