آزاد کشمیر قانون ساز اسمبلی کے انتخابات کے دوسرے مرحلے کی تیاری مکمل

مظفرآباد(ڈیلی پاکستان آن لائن)آزاد جموں و کشمیر قانون ساز اسمبلی کے انتخابات کے دوسرے مرحلے کی تیاریاں مکمل کر لی گئی ہیں۔ مہاجرین کی تین نشستوں پر راولپنڈی اور اسلام آباد میں پولنگ 2 اگست کو ہوگی۔

نجی ٹی وی سما نیوز کے مطابق الیکشن مہاجرین کی نشستوں ایل اے 39 جموں 6،ایل اے 43 ویلی 4 اور ایل اے 44 ویلی 5 پر ہوگا، جہاں استحکام پاکستان پارٹی،مسلم لیگ (ن)، پاکستان پیپلز پارٹی،جماعت اسلامی اورمسلم کانفرنس کے امیدوار مدمقابل ہیں۔

الیکشن حکام کےمطابق ایل اے 43 میں 12، ایل اے 44 میں 8 جبکہ ایل اے 39 جموں 6 میں 14 امیدوار میدان میں ہیں۔

ایل اے 39 جموں 6 کے لیے 155 پولنگ سٹیشن قائم کیے جائیں گے،جبکہ اس حلقے میں چکوال، جہلم، اٹک، پشاور اورتلہ گنگ شامل ہیں،ایل اے 43 کے لیے 10 اور ایل اے 44 کے لیے 27 پولنگ سٹیشن قائم کیے گئے ہیں۔