پشاور (ویب ڈیسک) پشاور کے قریب فیڈرل کانسٹیبلری کی ایک چوکی پر مسلح افراد کے حملے میں 6 اہلکار شہید جبکہ 4 زخمی ہوئے ہیں۔
خیبر پختونخوا کے سینیئر پولیس حکام نے اس حملے کے بارے میں بی بی سی سے بات کرتے ہوئے 6شہادتوں کی تصدیق کی ہے۔
دوسری جانب سیکیورٹی ذرائع نے بھی ’’بی بی سی‘‘ کو بتایا کہ چوکی میں تعینات اہلکاروں نے حملے پر فوری جوابی کارروائی کی، جس میں4 حملہ آوروں کے مارے جانے کی اطلاع ہے لیکن فرار ہوتے مسلح شدت پسند لاشیں ساتھ لے گئے ہیں۔سیکیورٹی ذرائع نے بتایا کہ حملہ آور ایف سی کے 6 اہلکاروں کو بھی ساتھ لے گئے ہیں اور اس وقت علاقے میں آپریشن جاری ہے۔
یہ واقعہ پشاورکے قریب حسن خیل کے علاقے میں رات 1 سے 2 بجے کے درمیان پیش آیا۔حسن خیل کا علاقہ نیم قبائلی علاقہ درہ آدم خیل کے قریب واقع ہے۔
وفاقی وزیر داخلہ محسن نقوی اور وزیر مملکت طلال چوہدری نے پشاور میں فیڈرل کانسٹیبلری کی چوکی پر ہونے والے حملے میں شہید اہلکاروں کی نماز جنازہ میں شرکت کی۔
