مصنف: ارشادالعصر جعفری
قسط:46
”یہ میری زندگی ہے!“
”یہ تمہاری زندگی نہیں!“ انسانپ چیخا۔ ”یہ وہ زندگی ہے جو تمہیں دی گئی تھی!“
زاور ساکت ہو گیا۔ انسانپ نے ہاتھ ہٹا لیا۔”اور جو زندگی تم نے خود کمائی،“ اس نے کہا،”وہ ابھی شروع بھی نہیں ہوئی۔“
آئینے میں موجود آدمی اب مکمل طور پر پلٹ چکا تھا۔ زاور نے اس کا چہرہ نہیں دیکھا، مگر ایک آواز سنی: ”زاور۔۔۔“ اس بار وہ آواز نہ بچے کی تھی، نہ اس کی ماں کی، نہ انسانپ کی۔ وہ ایک ایسی آواز تھی جس میں عمر کا کوئی اندازہ نہیں تھا۔ نہ مرد، نہ عورت، نہ بچہ۔ بس ایک آواز۔ ”تم نے مجھے بہت انتظار کروایا۔“
”تم کون ہو؟“ زاور نے پوچھا۔
”میں وہ ہوں،“ وقفہ، ”جسے تم نے گیارہویں دن مرنے سے انکار کیا تھا۔“
زاور کا دل جیسے رک گیا۔ ”میں؟“
”نہیں۔“ آواز ہنسی۔ ”تم سے پہلے والا تم۔“
زاور نے انسانپ کی طرف دیکھا۔ ”یہ کیا کہہ رہا ہے؟“
انسانپ نے آنکھیں بند کر لیں۔”اب تمہیں خود سننا ہوگا۔“
آئینے میں موجود وجود نے اپنا ہاتھ اٹھایا۔ آئینے کی سطح پر لہریں بنیں۔ اور پھر زاور نے اپنا گھر دیکھا --- وہی گھر، وہی رات، وہی بارش۔ مگر اس بار منظر میں ایک ایسی چیز بھی تھی جسے اس نے پہلے کبھی نہیں دیکھا تھا۔ اس کی ماں کے ہاتھ میں نومولود بچہ تھا، اس کے سامنے انسانپ کھڑا تھا، اور ان دونوں کے درمیان ایک چھوٹا سا لکڑی کا صندوق تھا۔
صندوق کھلا۔ اندر ایک دوسرا بچہ پڑا تھا، بالکل زاور جیسا۔ ماں نے خوف سے پیچھے قدم ہٹایا۔ ”یہ کیا ہے؟“
انسانپ نے کہا: ”یہ اصل ہے۔“
ماں نے اپنے بازوؤں میں موجود بچے کو دیکھا، پھر صندوق میں پڑے بچے کو۔ ”پھر یہ؟“
”یہ دروازہ ہے۔“
ماں چیخ اٹھی: ”نہیں!“
زاور کی آنکھیں پھیل گئیں۔ اسے لگا جیسے زمین اس کے نیچے سے کھسک گئی ہو۔ صندوق میں پڑا بچہ آنکھیں کھول چکا تھا، اور اس نے سیدھا آئینے کے پار زاور کو دیکھ لیا۔ پھر بچے نے مسکرا کر کہا: ”تم آخر مجھے دیکھ ہی رہے ہو۔“
زاور کے پیچھے کھڑی چیز نے اسی لمحے اس کے کندھے پر ہاتھ رکھ دیا۔ انسانپ چیخا: ”زاور! اب پیچھے مت دیکھنا!“
اور زاور نے پہلی بار محسوس کیا کہ اس کے کندھے پر رکھا ہوا ہاتھ، اس کے اپنے ہاتھ جیسا تھا۔
(جاری ہے)
نوٹ: ادارے کا مصنف کی آراء سے متفق ہونا ضروری نہیں
