لاہور (خصوصی رپورٹ ) منظوری حاصل کر لینے والی نئی اور جان بچانے والی ادویات کو مریضوں تک پہنچانے میں مسلسل تاخیر پاکستان کے ادویات سے متعلق ضابطہ جاتی نظام کی ایک سنگین ناکامی ہے۔ اس امر کا کوئی معقول جواز پیش نہیں کیا جا سکتا کہ جو ادویات ڈرگ ریگولیٹری اتھارٹی آف پاکستان کے مقرر کردہ معیار اور تمام ضروری مراحل مکمل کر چکی ہیں، وہ صرف اس لیے عوام کی دسترس سے باہر رہیں کہ حکومت نے ابھی تک ان کی قیمتوں کی منظوری نہیں دی۔
مریضوں کے لیے یہ محض کسی تکلیف یا انتظامی رکاوٹ کا معاملہ نہیں، بلکہ صحت اور کئی صورتوں میں زندگی اور موت کا سوال ہے۔ اطلاعات کے مطابق تقریباً 40 رجسٹرڈ ادویات کئی ماہ سے قیمتوں کے نوٹیفکیشن کی منتظر ہیں، حالانکہ متعلقہ عمل مکمل ہو چکا ہے اور سفارشات وفاقی حکومت کو بھی بھجوائی جا چکی ہیں۔
