لاہور (ڈیلی پاکستان آن لائن) صدر مسلم لیگ (ن) نواز شریف کی زیرِ صدارت اہم بیٹھک کے دوران نئے صونوں سے متعلق امور پر مشاورت ہوئی۔
نجی ٹی وی چینل ’’اے آر وائی نیوز‘‘ کے مطابق نواز شریف کی زیر صدارت مسلم لیگ (ن) کا مشاورتی اجلاس ہوا جس میں وزیر اعظم شہباز شریف، نائب وزیر اعظم اسحاق ڈار سمیت مرکزی رہنماؤں نے شرکت کی۔
ذرائع کے مطابق اجلاس میں ملک کی مجموعی سیاسی صورتحال اور نئے صوبوں سے متعلق امور پر مشاورت کی گئی، جبکہ صوبوں اور انتظامی یونٹس کے معاملے پر پارلیمنٹ میں بحث کے فیصلے کا خیرمقدم کیا گیا۔
اجلاس میں عوام کی خواہشات اور قومی مفاد کو سامنے رکھتے ہوئے فیصلے کرنے پر اتفاق کیا گیا، جبکہ پیپلز پارٹی اور مسلم لیگ (ن) کے درمیان سیاسی اختلافات کے خاتمے کیلیے رابطے جاری رکھنے پر بھی اتفاق کیا گیا۔
