میں نے پاکستان اور بھارت کے درمیان جنگ رکوائی، امید ہے روس یوکرین جنگ بھی جلد رک جائے گی، ڈونلڈ ٹرمپ

لاہور(ڈیلی پاکستان آن لائن)امریکی صدر ڈونلڈ ٹرمپ نے کابینہ کے اجلاس میں گفتگو کرتے ہوئے کہا کہ امریکہ تیزی سے ترقی کررہا ہے،10ماہ میں 18ٹریلین کی سرمایہ کاری ہوئی، امریکہ میں مہنگائی کم ہوئی،سٹاک مارکیٹ میں تیزی آئی، ملک کی تاریخ کی بدترین مہنگائی وراثت میں ملی، پٹرول کی قیمت کو 2 ڈالر فی گیلن تک لے جا سکتے ہیں، ہم نے دوائیوں کی قیمتوں میں ریکارڈ کمی کی، میری ٹیم نے 800 فیصد تک ادویات کی قیمتیں کم کروائیں ۔

انہوں نے کہا کہ میں نے 9ماہ میں 8 جنگیں روکوائیں، اب صرف ایک جنگ رہ گئی ہے، میں نے پاکستان اور بھارت کے درمیان جنگ رکوائی، امید ہے روس یوکرین جنگ بھی جلد رک جائے گی ، ہم نے محکمہ دفاع کا نام بدل کر محکمہ جنگ رکھا، جب بھی میں کوئی جنگ ختم کرتا ہوں، لوگ کہتے ہیں اسے نوبل انعام ملے گا، پھر لوگ کہتے ہیں یہ والی جنگ ختم کرے تونوبل انعام ملے گا، پچھلی والی پر نہیں، اب کہتے ہیں اگر میں نے روس یوکرین جنگ ختم کرا دی تو نوبل انعام ملے گا،مجھے تو ہر جنگ رکوانے کے بدلے نوبل انعام ملنا چاہیے، میں لالچی نہیں بننا چاہتا۔

ان کا کہناتھا کہ روس یوکرین 9ویں جنگ ہوگی جو میں رکواؤں گا، روس اور یوکرین جنگ کی صورتحال آسان نہیں ،بہت پیچیدگیاں ہیں، گذشتہ ماہ روس یوکرین جنگ میں 27ہزار لوگ مارے گئے، ریاست لوزیانا اور نیوآورلینز میں نیشنل گارڈز تعینات کرینگے۔