کھڑکی والی نشست حاصل کرنے کیلیے اصل اور خونخوار جنگ تو بچوں میں ہوتی تھی،بچے سو جاتے تو ان کو ہٹا کر گھر کے بڑے  تھوڑی بہت تانکا جھانکی کر لیتے 

مصنف:محمدسعیدجاوید

قسط:280

یہ ساری کہانیاں کچھ برس پہلے تک کی ہیں۔ اب حالات بدل رہے ہیں جیسے جیسے کرائے کی رقم یا گاڑی کے معیار میں اضافہ ہوتا جا رہا ہے سہولتیں بہتر ہوتی جا رہی ہیں۔ بہت اونچے درجے کے مسافروں کے لیے تو اب بہت بہتری آگئی ہے تاہم نچلے درجوں تک پہنچنے میں کچھ وقت لگے گا، تب تک ان شاء اللہ لوگوں کے رویئے بھی بدل چکے ہوں گے۔

کھڑکی کھول دو

چلیں ایک بار ماضی کے زینے اترتے ہوئے گزرے وقتوں میں چلتے ہیں اور چشم تصور سے دیکھتے ہیں کہ ڈبے کے اندر کھڑکی کے قریب والی نشست کے حصول کے لیے کیسے کیسے ڈرامے اور بحث و تکرار ہو رہی ہوتی تھی۔ کسی بڑے کی طرف سے تو کھڑکی والی نشست حاصل کرنے کے لیے وہاں پہلے سے براجمان مسافر سے انسانی ہمدردی کی بنیاد پر درخواست کی جاتی تھی جس کے لیے بیماری یا دم گھٹنے کاعذر بیان کیا جاتا تھا اور اپنی بات میں وزن پیدا کرنے کی خاطروہ دو چار اْکھڑے اْکھڑے سانس لیتا اور کھانس کر بھی دکھاتا تھا۔ کچھ لوگ تو ترس کھا کر اس کو وہ جگہ دے دیا کرتے تھے، جس کو پاتے ہی وہ مسافر سب دْکھوں سے بے نیاز ہو کر مطمئن ہوجاتا۔ کچھ دیر مزید بیماری کی ادا کاری کرنے کے بعد وہ باقاعدہ باہر کی تازہ ہوا سے لطف اندوز ہونا اور گنگنانا بھی شروع ہو جاتا تھا۔ لیکن بعض مسافر تو اتنے سنگدل ہوتے تھے کہ کچھ بھی ہوجائے وہ اپنی نشست سے دستبردار ہونے پر تیار ہی نہیں ہوتے تھے۔

ہاں اگر نشستیں محفوظ کروا لی جاتی تھیں تو کھڑکی والی نشست کا دعوے دار ذرا بھی تردد نہ کرتا اور وہاں بیٹھے ہوئے شخص کو گھورتا ہوا اپنا ٹکٹ اس کی آنکھوں کے سامنے لہراتا یہ بتانے کے لیے کہ یہ نشست ریلوے حکام نے اس کے نام لکھ دی ہے لہٰذا وہ کہیں اور اپنا ٹھکانہ کر لے اور اپنے اس قبضے کو طول دینے کی کوشش بھی نہ کرے۔ دستاویزی ثبوت ساتھ ہوتا تھا، انکار کی گنجائش نہیں ہوتی تھی اس لیے قابض شخص کو وہاں سے اٹھنا ہی پڑتا تھا ورنہ اصلی دعوے دار دوڑ کر ٹی ٹی بابو کو بلا لاتا تھا اور پھراتنے سارے مسافر ساتھیوں کی موجودگی میں یوں اٹھایا جانا ایک قابل شرمندگی عمل ہوتا تھا اس لیے کھسیانا سا ہو کر وہ دوسری طرف کی نشست پر کھسک جاتا تھا۔

کھڑکی والی نشست حاصل کرنے کے لیے اصل اور خونخوار جنگ تو ایک ہی خاندان کے بچوں کے بیچ میں اس وقت ہوتی تھی جب ہر کوئی باہر جھانکنے کے لیے وہ نشست اپنے نام کروانا چاہتا تھا اور دوسرے ایسا ہونے نہیں دیتے تھے۔ عام حالات میں ایسا چھوٹا موٹا قضیہ تشدد یا محبت سے حل کرلیا جاتا تھا، اور باری باری ان کو وہاں بیٹھنے کا موقع دیا جاتا تھا۔ اور جب بچے تھک ہار کر سو جاتے تو ان کو وہاں سے ہٹا کر گھر کے بڑے خود وہاں بیٹھ کر تھوڑی بہت تانکا جھانکی کر لیتے تھے۔

گاڑی،خصوصاً چھوٹے درجے کے ڈبوں میں کھڑکیوں کی اہمیت اس لیے بھی بہت زیادہ ہوتی تھی کہ تب گاڑیوں میں ائر کنڈیشنڈ نہیں ہوا کرتے تھے اور شروع میں تو اکثر ڈبوں میں برقی پنکھے بھی نہیں ہوتے تھے یہ بہت بعد میں نصب ہوئے تھے۔ بلا کی گرمی میں مسلسل دھوپ میں دوڑتی ہوئی گاڑی کے ڈبوں کی فولادی چھت اور دیواریں تپ کر بھٹی بن جاتی تھیں۔ اوپر چھت پر گھومنے والا پنکھا، اگر لگا ہوا ہوتا تھا،تو وہ کسی دم کرنے والے پیر کی طرح ایک مسافر پر ذرا سی ہوا پھونک کر اس پر احسان جتلاتا ہوا آگے بڑھ جاتا تھا اور جب اگلے بندے کو کچھ مزہ آنے لگتا تو وہ اس سے بھی مکھ موڑ کر اور آگے چلاجاتا۔ اور آخر میں جب وہ محلے بھر میں خجل خوار ہوکر ایک بار پھرپہلے مسافر کی طرف لوٹتا تو وہ اس وقت تک شدید گرمی کا گلہ شکوہ شروع کر چکا ہوتا تھا۔

(جاری ہے)

نوٹ: یہ کتاب ”بک ہوم“ نے شائع کی ہے (جملہ حقوق محفوظ ہیں)ادارے کا مصنف کی آراء سے متفق ہونا ضروری نہیں۔