افغانستان نے اپنی معیشت  کا ماڈل  رینٹ اے  ٹیرریسٹ پر کھڑا کر لیا ہے، ماہر بین الاقوامی امور ڈاکٹر شازیہ انور چیمہ

لاہور(ڈیلی پاکستان آن لائن) ماہر بین الاقوامی امور ڈاکٹرشازیہ انور چیمہ نے کہا کہ پاکستان کو افغانستان کے ساتھ دو ٹوک بات کرنی چاہیے،افغان حکومت کو چاہیے کہ اپنے آپ کو ایک جمہوری حکومت کی طرح پیش کرے،افغانستان کے جو اندرونی معاملات ہیں وہ بہت تشویشناک ہیں، وہاں کے مختلف گروپ سونے کی کانوں کےلیے آپس میں لڑ پڑے ہیں اور یہ لڑائی شدید ہوتی جارہی ہے ۔

24نیوز کے پروگرام گونج میں گفتگو کرتے ہوئے ڈاکٹرشازیہ انور چیمہ کاکہناتھا کہ افغان حکومت کو ہر گروپ کو یہ سمجھانا چاہیے کہ انہیں پائیدار معاشی استحکام چاہیےجس کیلئے پاکستان انہیں ہمیشہ رہنمائی فراہم کرتا ہے اور دوسرے ممالک جیسے چائنا اور روس کو بھی آپ کے ساتھ شامل کر رہا ہے ۔اور یہ اس لیے کیا جاتا ہے کہ آپ نے جو اپنی معیشت کا ماڈل رینٹ اے ٹیرریسٹ پر کھڑا کر لیا ہے آپ اس کو چھوڑ دیں گے۔لیکن دیکھنے میں یہ آرہا ہے کہ آپ کو یہ شارٹ ٹرم ماڈل ہی پسند ہے ۔اس کا ثبوت یہ ہےکہ یہ جو پاکستان کے خلاف آپ نے جارحیت کی ہے یہ آپ نے انڈیا سے پیسے لے کر اور ان سے وعدے کر کے کی ہے ورنہ آپ کے مقاصد کیا تھے ، کیا آپ نے پاکستان کو فتح کر لینا تھا اس کا تو پاکستان نے آپ کو جواب دے دیا اور ایسا دیا کہ آپ سفید جھنڈے لہرا لہرا کر سیز فائر کی درخواست کر رہے تھے۔