تحریک چلانا بانی پی ٹی آئی کے بیٹوں کا حق ہے،پاکستان میں انہیں خوش آمدید کہیں گے،عطااللہ تارڑ

اسلام آباد (ڈیلی پاکستان آن لائن) وفاقی وزیر اطلاعات عطا اللہ تارڑ کا کہنا ہے کہ بانی پی ٹی آئی کے بیٹے ضرور پاکستان آئیں، خوش آمدید کہیں گے۔

میڈیا سے گفتگو کرتے ہوئے وزیر اطلاعات نے کہا کہ تحریک چلانا بانی پی ٹی آئی کے بیٹوں کا حق ہے۔ البتہ وہ جہاں جائیں یہ ضرور بتائیں کہ ان کے والد کو میگا کرپشن کیس میں سزا ہوئی ہے۔بانی پی ٹی آئی 190 ملین پاؤنڈ کرپشن کیس میں اپنے دفاع میں کوئی ثبوت پیش نہیں کر سکے۔

وزیر اطلاعات کا مزید کہنا تھا کہ دہشت گردی صرف پاکستان کا نہیں پوری دنیا کا مسئلہ ہے، پاکستان نے دہشت گردی کے تدارک کے لیے غیر معمولی اقدامات کیے ہیں، ہم واحد ملک ہیں جہاں اسکولوں کو بھی نشانہ بنایا گیا، دہشت گردوں کا کوئی مذہب، رنگ اور نسل نہیں ہوتی، پاکستان دنیا کے لیے دہشت گردی کے خلاف ایک شیلڈ ہے۔وفاقی وزیر نے کہا کہ بلوچستان میں حالیہ افسوسناک واقعہ دہشت گردی اور پُرتشدد انتہا پسندی کا واقعہ ہے۔