کوئٹہ(ڈیلی پاکستان آن لائن)نصیرآباد میں گیس کمپریسر پھٹنے سے ایک ہی گھر کے تین معصوم بچے اور ان کی والدہ زندگی کی بازی ہار گئے۔
نجی ٹی وی چینل جیو نیوز کے مطابق نصیرآباد کے علاقے ابڑو کالونی کے رہائشی شاہد علی ابڑو کے گھر میں اچانک اے سی کا کمپریسر پھٹا، تو ایک قیامت برپا ہوگئی، شاہد علی کا 2سالہ بیٹا موقع پر ہی جاں بحق ہوگیا جب کہ شاہد علی، ان کی اہلیہ، ایک بیٹا اور بیٹی شدید زخمی ہوگئے۔
واقعے کی اطلاع ملتے ہی زخمیوں کو فوری طور پر کراچی منتقل کیا گیا لیکن 3 روز تک زندگی اور موت کی کشمکش میں رہنے کے بعد شاہد علی کی اہلیہ، بیٹا اور بیٹی بھی جانبر نہ ہوسکے۔
یک ہی گھر سے ماں اور دو بچوں کی میتیں اٹھیں تو گھر کا ہر کونہ سوگ میں ڈوب گیا۔
شاہد علی کے بھائی کا کہنا تھا کہ شاہد علی پولیس میں کلاس فور کا ملازم ہے، بہت محنت سے گھر چلاتا تھا، ہمیں کیا معلوم تھا کہ گیس کمپریسر ہی ہمارے گھر کی خوشیاں اجاڑ دے گا جب کہ شاہد علی خود شدید زخمی حالت میں ہسپتال میں زندگی کی جنگ لڑ رہا ہے۔
