نیپا چورنگی حادثہ: شاول کا ڈیزل ختم ہونے پر  شہریوں نے چندہ اکٹھا کر کے ڈیزل خریدا

کراچی (ڈیلی پاکستان آن لائن)مین ہول میں گر کر تین سالہ بچے کی موت کے دلخراش واقعے نے شہر کو سوگوار کر دیا۔ جائے حادثہ پر کھدائی کے لیے استعمال ہونے والے شاول کا ڈیزل ختم ہو گیا، جس پر وہاں موجود شہریوں نے اپنی مدد آپ کے تحت چندہ جمع کرنا شروع کر دیا۔

عینی شاہدین کے مطابق ویڈیو سوشل میڈیا پر تیزی سے وائرل ہو رہی ہے، جس میں دیکھا جا سکتا ہے کہ حادثے کے مقام پر موجود لوگوں نے اپنی جیبوں سے رقم نکال کر ڈیزل خریداری کے لیے چندہ اکٹھا کیا۔ کسی نے 50 روپے، کسی نے 100 روپے جبکہ کچھ افراد نے ایک ہزار روپے تک دے کر حصہ ڈالا۔

چند منٹوں میں تقریباً 15 ہزار روپے جمع ہو گئے، جس کے بعد فوری طور پر شاول میں ڈیزل ڈلوا کر کھدائی کا عمل دوبارہ شروع کیا گیا۔

شہریوں کا کہنا تھا کہ بچے کی جان بچانے کے لیے ہر ممکن کوشش کی گئی، تاہم افسوسناک واقعہ پیش آگیا جس نے ہر دل کو غمگین کر دیا۔ عوام نے انتظامیہ سے مطالبہ کیا کہ کھلے مین ہولز بند کیے جائیں تاکہ مستقبل میں ایسے سانحات کا خاتمہ ہو۔