لاہور(ڈیلی پاکستان آن لائن )سینئر صحافی ارشاد بھٹی نے کہا ہے کہ انہیں نیشنل سائبر کرائم انویسٹی گیشن ایجنسی (این سی سی آئی اے) کا نوٹس موصول ہو چکا ہے جس میں انہیں کل لاہور میں پیش ہونے کی ہدایت کی گئی ہے۔ انہوں نے واضح کیا کہ چیف سیکریٹری کے گھر کی تزئین و آرائش کی خبر میری اپنی تحقیقاتی رپورٹ نہیں تھی بلکہ پبلک ٹی وی کی تھی جو میں نے اسی طرح بیان کی ، اگر یہ تزئین و آرائش نہیں ہوئی تو میں معذرت خواہ ہوں۔
اپنے وی لاگ میں گفتگو کرتے ہوئے ارشاد بھٹی نے کہا کہ خبر پنجاب میں مبینہ شاہ خرچیوں، مہنگائی اور دیگر معاملات سے متعلق تھی، تاہم اس میں ایک نکتے پر تنازع پیدا ہوا جس میں دعویٰ کیا گیا تھا کہ چیف سیکریٹری پنجاب کی رہائش گاہ کے لان پر 22 کروڑ روپے خرچ کیے جا رہے ہیں۔انہوں نے بتایا کہ انہیں اس خبر کا دو روز بعد علم ہوا اور پھر انہوں نے متعلقہ صحافی کے نام کے ساتھ اسے من و عن اپنے وی لاگ میں پیش کیا۔
