لاہور میں طلبا کی حفاظت کیلئے سکول چھٹی کے اوقات میں سخت ہدایات جاری

لاہور(ڈیلی پاکستان آن لائن) ضلعی انتظامیہ نے لاہور میں طلبا کی حفاظت کے لیے سکول چھٹی کے اوقات میں سخت ہدایات جاری کر دیں۔

نجی ٹی وی چینل ہم نیوز کے مطابق ڈسٹرکٹ ایجوکیشن اتھارٹی لاہور نے شہر کے تمام سکولوں میں طلبا کی حفاظت کو یقینی بنانے کے لیے چھٹی کے وقت ہر طالب علم کی مکمل چیکنگ لازمی قرار دے دی۔ جبکہ سکول انتظامیہ کو یہ بھی یقینی بنانے کا حکم دیا گیا ہے کہ کوئی طالب علم سکول کے اندر نہ رہ جائے۔

اتھارٹی نے سکول سربراہان کو ہدایت کی ہے کہ کلاس رومز، لیبارٹریز، واش رومز اور گراؤنڈز کی مکمل تلاشی لی جائے تاکہ کسی بھی قسم کی غفلت سے بچا جا سکے۔

نوٹیفکیشن میں کہا گیا ہے کہ مقررہ اسٹاف اس وقت تک سکول نہیں چھوڑے گا جب تک تمام طلبا بحفاظت اپنے گھروں کو روانہ نہ ہو جائیں۔

ڈسٹرکٹ ایجوکیشن اتھارٹی نے واضح کیا ہے کہ ان ہدایات پر عملدرآمد نہ ہونے کی صورت میں متعلقہ ادارے کے سربراہ کو ذمہ دار ٹھہرایا جائے گا۔