آئی ایم ایف سے سٹاف لیول معاہدہ طے پا چکا، منظوری مئی کے اوائل میں متوقع ہے: وزیر خزانہ محمد اورنگزیب

واشنگٹن(ڈیلی پاکستان آن لائن)وفاقی وزیرِ خزانہ محمد اورنگزیب نے کہا ہے کہ آئی ایم ایف سے سٹاف لیول معاہدہ طے پا چکا ہے، ایگزیکٹیو بورڈ سے منظوری مئی کے اوائل میں متوقع ہے۔

روزنامہ جنگ کے مطابق واشنگٹن میں سِٹی میکرو فورم سے خطاب میں انہوں نے کہا کہ مشرقِ وسطیٰ کا بحران حالیہ تاریخ کے بڑے ترین سپلائی شاکس میں سے ایک ہے۔

وزیرِ خزانہ نے کہا کہ موجودہ بحران سے حاصل ہونے والا سبق پیٹرولیم ذخائر کی تعمیر ہے، قابلِ تجدید توانائی کی جانب منتقلی کو تیز کرنے کی ضرورت ہے۔

انہوں نے سعودی عرب کی مالی معاونت پر گہری قدر دانی کا اظہار کیا اور پاکستان کے گلوبل میڈیم ٹرم نوٹ پروگرام کے اجراء کی تصدیق کی۔

وزیرِ خزانہ محمد اورنگزیب نے سرمایہ کاروں کو اقتصادی حکمتِ عملی پر بریفنگ بھی دی۔

ان کا کہنا ہے کہ کراچی پورٹ پر ٹرانزٹ حجم میں اضافہ ہوا ہے، لیڈ منیجرز کے انتخاب کے لیے ریکویسٹ فار پروپوزلز 3 شعبوں میں جاری کی جا رہی ہیں، جن میں یورو بانڈز، اسلامی سکوک اور ڈالر میں سیٹل ہونے والا روپے سے منسلک بانڈ شامل ہے، پاکستان کے پہلے پانڈا بانڈ کے اجراء کا ہدف مئی مقرر کیا گیا ہے۔